Meetei Mayek ṭawngin India Constitution buatsaih dawn : Biren Singh

Manipur chief minister N. Biren Singh chuan India constitution chu Meetei Mayek ṭawngin buatsaih a nih tur thu a sawi.

Biren Singh hian he thu hi X-ah post-in,"Government of Manipur, Law and Legislative Affairs Department-in India constitution diglot edition (English-Manipur) an tlangzarh leh tur hi lawmawm ka ti takzet a, min tilawm zualtu em em chu he edition hi Meetei Mayek script-a buatsaih a ni tur hi a ni," tiin a tarlang. Singh chuan India constitution pawimawhna leh hlut zia sawiin, ram chhunga an inrelbawlna zawng zawng chu chuta ṭanga rawn chhuak a nih thu leh, inkaihhruaina an neih zawng zawng; mimal dikna chanvo leh tihtur te, politics-a inrelbawlna leh sorkar kal dan zawng zawng chu India constitution-a innghat a nih thu a tarlang.

"Constitution hi kum 73 zet nei tawh mah ila a chhung thute hi mi nawlpuiin kan hre lo a, hei hi mahni ṭawng ngeia chhiar tur a awm loh vang a ni. Tuna Meetei Mayek edition chhuak turah hian amendment 105-na thleng huamtir a ni dawn a, Manipur tana rohlu tling a nih ngei ka beisei," tiin Singh chuan a sawi bawk.