Manipur : Pawikhawihna tuartu hmeichhiate tana Rs. vbc 5 ruahman

Manipur sorkar chuan tualchung buaina chhuak avanga hmeichhia chunga pawikhawihna chi hrang hrang; pawngsual tawk, mipui kut tuar leh kawng hrang hranga harsatna tawkte zángnadawmna pekna turin Rs. vbc 5 ruahman a nih thu November 20 khan Supreme Court a hriattir. Manipur sorkarin Supreme Court-a affidavit a theh luhah hian hmeichhia eng zat tan nge pawisa hi pek chhuah tura ruahman tarlan a ni lo thung.

Manipur-a tribal Kuki-Zo leh Meitei hnam inkara buaina chhuak avang hian mi 180-in nunna an chan tawh. Manipur sorkarin August thlaa Supreme Court-a affidavit a theh luha tarlan a nih danin, Central Bureau of Investigation (CBI) chu pawngsual, hmeichhe thah leh kut tuar kaihhnawih case 20 chhui tura tih an nih thu a lang. Supreme Court hriattirna angin Manipur sorkar hian tualchhung buaina chhuak avanga hmeichhe pawngsual tawk leh kut tuarte tana zángnadawmna pek a tum zat chu a tisang a ni. Hmeichhe nunna chan leh pawngsual rawn tawkte tana zángnadawmna pek tur chu Rs nuai 5 - nuai 10 inkar a ni. Pawikhawihna dang, pawngsual, mipat hmeichhiatna hawia kut tuar leh ram tui leiloa awm phahte chu Rs nuai 1 - nuai 9 inkar pek tura ruahman a ni bawk.

September thla khan Supreme Court hian Manipur sorkar hnenah an state chhunga sakhaw hmun ; Biak In, temple, Sanamahi temple, mosque leh a dangte chhinchhiaha zawng chhuak vek turin a lo hriattir tawh a, heng sakhaw hmunte hi Supreme Court chuan tualchhung buaina chhuak avangin tihchhiat a ni em tih leh, kutthlak ni ve lote pawh venhimna pek a, en zui turin thupek a lo chhuah tawh a ni. Court thupek hi state sorkar chuan October 16 khan chhanna pein, affidavit a theh luhah Manipur-a district 16 chhunga sakhaw hmun awm zawng zawngte, Noney leh Senapati district tih lohah chuan an dinhmun ena chhinchhiah vek an nih thu an hrilh.

Kangpokpi district-ah total shutdown

Kuki-Zo pawl, Committee on Tribal Unity (COTU) chuan Kuki-Zo mi pahnih thah an nih chungchangah Kangpokpi district-ah total shutdown neih a rel. COTU thuchhuahin a tarlan danin, Kuki-Zo mi pahnih thahte hi Leimakhong khaw mi Hanminlen Vaiphei leh Khunkho khaw mi, Thangminlun Hangshing te an ni.

COTU chuan,"Committee chuan sorkar laipuiin hleih nei taka ro rel ṭhin sorkar hnuaiah hian kan him tawh lo a ni tih an lo hriatna atan Kangpokpi district-a emergency shutdown neih kan rel a ni. Committee thuchhuak chuan Manipur aṭanga rorelna hran a rang lama neih pawh a phut bawk," tiin an tarlang. COTU chuan inthahna thleng ṭhin chu pumpelh theih a nih thu sawiin, hei hi Home Minister-in Kuki-Zo mipui a ngaihsak loh vanga thleng a ni, an ti.