Ralthuam ruk bo hmuh a nih chuan Manipur buaina a reh ang : Army

Army Eastern Command commanding officer, Lt. Gen. Rana Pratap Kalita chuan Gauhati press club te buatsaih programme-ah thu sawiin, Manipur-a hnam leh hnam inkara buaina chhuak chu state chhunga venhimna thawktute ralthuam 4,000 ruk bote hmuh let a nih hunah a tawp ang, tiin a sawi

Lt. Gen. Kalita chuan Manipur buaina chu inrelbawlna chungchanga buaina a nih thu sawiin, sipaite chu buaina punlun tur veng tur leh hnam buaite pahnih inkara inremna kawng zawng tura puitu hna an thawh ber thu a sawi a,"Indian army-te'n hna kan thawh hmasak ber chu mahni in leh lo tlansante chhan leh chhawmdawl a ni a, chumi hnuah chuan buaina punlun tur veng leh mipuite thinlunga inremna siamna tuh hna kan thawk leh a ni. Meitei leh Kuki te danglam leh inpersan lutuk avangin a khat tawkin buaina a awm reng a, hei hi inrelbawlna mumal zawk hmanga chinfel theih a ni," a ti.

"Kum 40 chuang chu Meitei, Kuki leh Naga te inkarah hian ram neitu chungchangah buaina a awm reng tawh ṭhin. Tuna thil thleng hi hemi chungchanga hnam pahnihte an inkalh tak tlat vang a ni. Buaina zualpui hi ziaawm angin lang tawh mah se, police station hrang hrang leh hmun dang aṭangin ralthuam 5,000 chuang ruk chhuah a ni a, hengte hi mipuite kutah a la awm a ni. Ralthuam lak let tawh hi 1,500 vel chauh a la ni thung a, ralthuam la hmuh let loh 4,000 hi lak let a nih hma chuan buaina hi a reh tak tak ngai lo ang," tiin Lt. Gen. Kalita chuan a sawi.

MBBS zirlaite'n exam phalsak an nih loh thu an sawi

Manipur-a tualchhung buaina chhuak avanga mahni in leh lo tlansan zinga MBBS zirlai eng emaw zat chuan Churachandpur district-ah lungawi lohna lantira kawng zawhin, tih ngai zawng zawng an tih hnuah pawh an exam hmasa ber tur atana exam phalsak an nih loh thu an sawi. Heng MBBS zirlai lungawi lohna lantirte hi mi 27 an ni a, zirlaite hian Manipur governor, Anusuiya Uikey chu an harsatna tawh chungchanga ngaihven turin an phut.

MBBS zirlaite hian exam tura fee pek ngai leh form fill-up ngai an tih vek hnuah pawh exam phalna pek an ni lo tih sawiin, National Medical Commission (NMC) pawhin an class kalna college aṭang kher lo pawhin exam a phalsak avangin Churachandpur Medical College (CMC)-ah an kal chhunzawm thu an sawi. Hetih lai hian BDS exam tur atan phalna pek an nih loh hnuah nimina exam awm, MBBS exam pawh phalsak an ni lo leh niin an sawi. Zirlaite hian MBBS zirlai mi parukte hnenah chauh admit card leh exam-na atana mamawhte pek an nih thu tarlangin, midang zawng erawh chuan engmah an dawn ve loh thu an tarlang bawk.

Zirlaite hian Tuibong bazar aṭanga kawng zawh ṭanin, deputy commissioner office kawtah sit-in dharna an nei chhunzawm a, additional DC hnenah memorandum an theh lut bawk. Zirlai nawrh huaihawtte hi North East Student Organisation (NESO) hruaitute chuan nimin khan an nawrhna hmunah an kawm a ni.