Meghalaya sorkarin assembly building hluiah museum din tum

Meghalaya chief minister, Conrad K Sangma chuan Shillong-a International Tourism Mart ṭum 11-na neih mekah press mite zawhna chhangin, Shillong leh Meghalaya hmun danga hmanlai hmun leh thil hlui an neihte chu khualzin hipna atana buatsaih an tum thu leh, Shillong-a assembly building hluiah museum din tum a nih thu a sawi.

Sangma chuan,"Heng hmun hluite dinhmun chawikan hi khualzin hipna hmanrua ṭha tak niin ka hria a, kan thil tum zawng zawng khaikhawmna pawh a tih theih bawk ang. Thil pawimawh hmasa erawh chu heng thilin a nghawng tur mi hrang hrangte nena inbiakna mumal tak neih leh, ruahmanna siam dan tur sawipui hi a ni a, hei hi vawiina hun kan hman chhan pawh hi a ni," a ti. "Kum 20 liam ta khan Shillong-a Meghalaya Legislative assembly house chu a kang a, tunah hian hmuh tlak a awm tawh lo. Engmah kan la tidanglam lo thung a, kan hna ṭhenkhat pawh saw lai hmunah saw'n kan la thawk ṭhin bawk. Tuna sak mek assembly building thar hi zawh a nih a, kan insawn hunah chuan sawlai hmun saw a vai lo deuhin, a ṭhen lai chauh tal pawh museum-a siam kan duh thu speaker hnenah pawh kan thlen tawh a ni,' tiin a sawi. Meghalaya assembly house thar hi September 2024-ah peih hman beisei a ni a, building hlui hi British hunlaia sak, Assam hnuaia an la awm lai huna mi a ni.

Meghalaya-in tourism ṭhanna leh environment humhimna atana ruahmanna a neihte zawhna chu Sangma chuan tourism tlo leh ecotourism lam hawia ruahmanna an siam thuin a chhang.