Meghalaya-ah India leh US special force te'n joint exercise nei

India leh US special force-te chuan Thawhlehni aṭang khan Meghalaya-a Umroi cantonment-ah 'Vajra Prahar 2023' tih hmangin joint exercise an nei. Joint exercise atana US special force lo kalte hi 1st special forces group-a mite an ni a, Indian Army aiawh hian Eastern command-a special forces personnel-te an tel.

Defence thupuangtu chuan hetiang joint exercise hi an neih ṭum 14-na a nih thu sawiin, mission atana ruahmanna siam leh operation neih dawna inbuatsaih dan chungchanga tihdan leh tawn hriat ṭha te inhrilh tawn leh inentir tawn chu a tum ber a nih thu a sawi.

Joint exercise hi December 11 thleng neih tur a ni a, India leh US sipaite hian special operation atana inbuatsaihna enchhinna an neih dawn bakah, firfiak beih dan leh hmun rem leh hmun rem loa ral rel dan chu a lemin an zir dawn bawk a ni. Exercise-ah hian hmun hla aṭanga sipai intirh luh belh dan ṭha te, tui lama sipai chet tlat dan bakah hmun hla zawka target fuh chat dan te, van lama inbeihna hrang hrang thleng thei leh sipai indah dan te an zir ang. He joint exercise ang hi 2010 khan a hmasa ber neih a ni tawh a, a ṭum 13-na chu Himachal Pradesh, Bakloh-a special forces training school-ah neih a lo ni tawh bawk a ni.