Manipur : Tribal pawlte'n nasa zawka nawrh huaihawtah vau

Manipur-a tribal pawl, Committee on Tribal Unity (COTU) te'n Kangpokpi district-a shutdown an neih mek chu Nilaini khan titawp mah se, nimin khan NH-2 a Leikop-ah nawrh an huaihawt chhunzawm a, National Highway -2 leh National Highway-37 te an dang mek bawk a ni. CoTU-in shutdown an neih lai hian dawr leh sikulte pawh khar vek a ni a, NH-2-a lirthei tlan turte pawh dan vek an ni.

Nawrh huaihawtte hian Union Home Ministry hnenah thil eng emaw zat ngen an nei a, hei hi home ministry hian ni nga chhunga ngaihtuah turin an phut bawk. Pung khawmte chuan an thil phutte chu a rang lama ngaihtuahsak an nih loh chuan tun aia nasa zawka nawrh huaihawtah home ministry chu an vau.

CoTU media cell coordinator, NG Lun Kingpen chuan November 20-a Kuki-Zo mi pahnih thah an ni chu Valley Based Insurgent Groups (VBIG), ralthuam neite'n tribal laka an chetna rawng tak an lantir ṭum hnihna a ni tawh tih sawiin,"VBIG-te'n mi an thah hnua an hlawhtlinna lawma hun an hmang lai video leh thlalakte mipui hmuh theihin a awm a, fiahna awm loa inrinhlelhna avang ringawta Kuki-Zo mite man theih an nih chuan heng mite hi chu thiam loh chantir vat tur an ni," tiin, sorkar laipui leh dan an rinna tlahniam zel karah an kal dan chu thlak a nih loh chuan democracy leh India danpui deuhsawhna a ni ang, a ti. Kingpen chuan hnam tam zawkte inhlanna hmanrua atan hnam tlem zawkte hman an nih loh nan Prime Minister chu hma la turin a ngen a, CIA leh NIA-te'n an thubuai an chhuisak duh loh danah India mi ni ve lo ang mai an nih thu a sawi bawk.

CoTU te hian November 20-a Kuki-Zo mi pahnih thah an nih chungchangah darkar 48 chhung shutdown an kalpui a, pawikhawihna thleng hi VBIG te thil tih ni ngeia an hriat thu an sawi a ni. VBIG te vek hi September 12-a Kuki-Zo pathumte thattua rinhlelh an ni bawk.

Manipur him nan engpawh kan tih a ngai : CM Biren Singh

Manipur chief minister, N. Biren Singh chuan Imphal-a Rupmahal Theatre premier show neihnaah thu sawiin, Manipur himna leh venna atan eng thil mah indantir thei an nih loh thu a sawi. Biren Singh hi Rupmahal Theatre stage play premier-naah hian chief guest a ni.

Chief Minister chuan Manipur-in dinhmun ṭha lo tak a tawn mek chu hma hun eng tak an neih theih nan chhel taka tuar turin a hrilh a,"Hmun tam takah boruak muanawm zawk kan nei leh tawh a, kan buaina avang hian ramriah te pawh venhimna kan tikhauh bawk a ni. Assam Rifles bakah state police te, border security force leh central reserve police force mite pawh chah luh an ni a, uluk takin Manipur hmun hrang hrang dinhmun kan thlithlai reng a ni," tiin kal khawmte hmaah a sawi.