APPSC zawhna put ru chungchangah PAJSC-in sorkar hotute nena inkawm rawt

Arunachal Pradesh Public Service Commission (APPSC) zawhna put ru chungchangah

Pan Arunachal Joint Steering Committee (PAJSC) chuan chief minister Pema Khandu hoa roundtable meeting neih rawtin, buaina chinfel dan ṭha zawk sawiho a nih theih an beisei thu an sawi.

PAJSC hian Chief Minister hnenah hian lehkha theh lutin, November 29-a roundtable meeting neih an rawt. PAJSC vice president, Tadak Nalo chuan exam neih tur chungchanga zawhna put ru avanga exam neih tawh sut duhna awm avangin buaina chingfel tura an hmalakna a ṭhuanawp phah niin a sawi. Nalo chuan,"Tunah chuan exam pawh sut mai tura phutna hi ngaihtuah tel a ngai tawh. Sorkar hotute nen harsatna chinfel dan kan ngaihtuah vat hi a ṭul a ni," a ti.

APPSC zawhna put ru chungchangah PAJSC hian exam neih hnuhnung ber sut leh mai tura ngenna chu sorkar chuan an thil phut dang 12 te nen ngaihtuah vat se an duh thu an sawi. He thil thleng avanga February 17-18-a bandh huaihawt a nih laia nawrh huaihawt zinga mi an mante laka thubuai zawng zawng sut tur leh, hliam tuarte pawh zangnadawmna pe turin sorkar chu an ngen bawk.

PAJSC te hian thla 14 zet chu inbiakna nei turin sorkar an lo nawr tawh a, state sorkar chu buaina chinfelna mumal tak awm lo a, an thil tawnte haider luiah puhin, ṭhalaite hmakhua an tichhia niin an sawi. PAJSC hruaitute chuan APPSC chu anmahni avanga exam huaihawt thei lo an nih loh thu leh, zawhna put ru chungchanga a bultumtu bera ngaih, Taket Jerang pawh bail-a chhuah a nih leh avangin state sorkar chu a thil chhui kawnga inthlahdahah an puh bawk a ni.

Zawhna put ru chungchang hi APPSC assistant engineer (civil) exam ve pakhat, Gyamar Padung-a'n Itanagar police station-a complaint a theh luh avanga rawn irh chhuak niin, nikum August 29 khan complaint hi a theh lut a ni. Padung hian assistant engineer zawhna hi exam hmain hmuh tur a awm tawh niin a sawi.