AP-ah Education Department hnuaia thawk mi 250 chuang ban

Arunachal Pradesh-a Education department chuan thawktu mi 250 chuang a ban a, an zingah hian Primary Trained Teachers (PRTs), Trained Graduate Teachers (TGTs), Upper Division Clerks (UDCs), Lower Division Clerks (LDCs), leh Multi-Task Staff (MTS) te an tel.

Commissioner of Education Amjad Tak chuan thawktu banna thupek hi tichhuakin, an ban takte hi department protocol bawhchhiat vanga ban an ni tih a tarlang. PRT, TGT, UDC, LDC leh MTS zinga eng emaw zat chu an appointement order a lem a ni tih a hnuah hriatchhuah a nih thu sawiin, appointment enfiah tur hian inquiry committee din a ni. Committee hian uluk taka an enfiah hnuah, thawktu ban takte appointment order neih hi Directorate of Elementary Education aṭanga official-a pek chhuah a ni lo tih an tarlang.

Inquiry committee-in an thil chhuina report an pek hnuah, Education Department chuan appointment order lem hmanga nia sawi, hnathawktu 250 chuangte banna tur thupek hi a tichhuak zui ta a ni.