Angami zirlaite'n SAKHI staff lak chungchanga an lungawi lohna thu thlen

Nagaland khawpui, Kohima-a One Stop Centre, SAKHI-a staff lak chungchangah Northern Angami Students' Union (NASU) te chuan thil fel lo a awm nia hriain, Nagaland State Social Welfare Board secretary hnenah hma la turin an ngen. Thu tawp siam hun tur an bituk sak bawk.

NASU hian secretary hnena ultimatum an theh luhah hian ni 13 chhung hun an pe a, an hun tiam ral hmain department chuan thil dik lo awm chu chingfel turin an phut tih an tarlang. SAKHI staff lak hi a awmna district chhunga ram leilung mi tana zuah tur niin an sawi a ni.

Zirlai pawl hian an lehkha theh luhah hian kum 2019-a Angami Students' Union (ASU)-te'n ultimatum an lo theh luh tawh chu sawi langin, State Resources Centre for Women-a Mission Director hnenah centre administrator, case worker leh driver hna laknaah district chhunga ram leilung fa ni lo lak an nih thu an tarlang a ni.

Sorkar chu Office Memorandum an neih anga kal tura hriattirin, memorandum ang chuan sorkar hnuaia hna lakah garde-IV hna chu ram leilung fate zinga mi ngei lak tura intiamna a awm thu an sawi.

India sorkar hian One Stop Centre (OSC) hi April 1, 2015 aṭang khan a kalpui ṭan a, OSC-ah hian hmeichhia kut tuar leh mangangte tana hmun khata puihna an mamawh zawng zawng an dawn theihna tur; damdawi lam, dan lam, counselling, awmna lailawk leh na mamawh lo pekte kalpui a ni.