Manipur : Inquiry panel-in public hearing la nei lo

Manipur tualchhung buaina chhui chiang tura sorkar laipuiin a din, member pathum awmna, Commission of Inquiry (CoI) chuan din a nih aṭanga thla nga zet a ral hnuah pawh public hearing an la nei lo.

CoI hi Justice Ajay Lamba, Gauhati High Court chief justice hluiin a kaihruai a, IAS officer leh IPS officer bang tawh pakhat ve ve an tel bawk a ni.

September thlaah public hearing nei tura ruahman ni mah se, vawiin thlengin Delhi-ah emaw, Manipur-ah emaw pawh CoI hian hearing an la nei lo. November 20 khan mipuite tan tualchhung buaina thleng chungchangah inpuhna, thuchhuah leh thubuaite thlen turin ni 45 hun hawn a nih thu an la puang chauh a ni.

Ningani khan CoI hian thuchhuah siamin,"Imphal emaw Delhi-ah emaw Commission office-a thu thlen duh neite tana an affidavit him taka a thlen theih nan state sorkar chuan relief camp-ah te affidavit lak khawmna hmun tur a buatsaih a, sub-division leh district headquarter level-ah pawh theh luhna tur buatsaih a ni bawk. Mipuite hian an duh chuan Commission hnenah hian anmahni ngei kalin affidavit hi an theh lut thei bawk ang," tiin an tarlang.

CoI hian state sorkar hnuaia official hrang hrangte hnen aṭangin affidavit an dawng tawh thung a, affidavit theh luttu zingah hian Deputy Commissioner te pawh an tel a ni.

Official-te chuan tualchhung buaina kaihhnawihah Manipur-a public hearing nei tura an inbuatsaih mek thu tarlangin, a hmuna kal ve duhte tan pawh an kalna leh thlenna man senso tumsak tura ruahmanna an siam thu an sawi.