Helte nen inremna hawi inbiakna kan nei mek : CM Biren Singh

Manipur chief minister N. Biren Singh chuan a kaihhruai sorkar chuan Imphal Valley-a helpawlte nen inremna nei tura inbiakna an neih mek thu a sawi.

Chief Minister chuan inbiakna chu thui tak an neih tawh thu tarlangin, eng pawlte nen nge inbiakna an neih tih erawh a tarlang lo thung. May 3-a Manipur-a tualchhung buaina a chhuah hnuah tun hi sorkarin inbiakna neih chungchang a sawi hmasak ber a ni a, a hmain United National Liberation Front (UNLF) peng pakhat nen inbiakna an neih thuthang erawh a awm tawh a ni.

Joupi khaw beihnaah kum 21 mi thi

Inrinni khan Kangpokpi district-a Joupi khua chu mi tu tih hriat lohte'n silai nen beiin, mipa kum 21 mi a thi nia hriat a ni. Joupi khua hi Kuki-Zo awmna khua a ni a, buaina chhuah hunlai hi zing lam dar 2 leh a chanve vel niin an sawi.

Joupi khua beitute hian Joupi khuaa volunteer-te awmna bunker chu bitumin, bunker-a ral venga awm, Khupminthang Haokip hi an kap hlum a ni. Joupi khuaa inkah thawm avang hian Kangpokpi district-a khaw dang bakah Bishnupur district-ahte chuan boruak a sosang leh hman hle a, heng lai chhehvelah hian sipai dah luh belh nghal niin, Joupi khaw beitu misualte zawn hna hi thawh nghal a ni.

Indigenous Tribal Leaders' Forum (ITLF) chuan inbeihna thleng chu an dem thu sawiin, Joupi khaw mite chu huaisen taka an lo beih let avangin an fak bawk. ITLF hian buaina chhuak thei a la awm nia sawiin, anmahni rawn beitute chu Ngarian-ah a aia tam zawkin an inpun khawm leh niin an sawi. Kuki Students' Organisation (KSO) pawhin Joupi khaw beihnaa nunna chan, Khupminthang sunna hun an hmang bawk.