KSU-te'n Seng Kut Snem kutah bank leh office te khartir

Khasi Students' Union (KSU) chuan Khasi hnamte tana an kut pakhat, Seng Kut Snem zahawmna leh thianghlimna vawn a nih theih nana sorkar thupek chhuah chu mi ṭhenkhatin an zawm lo tih an sawi. Thupek zawm lo bank, office hrang hrang leh zirna in te chu an khar luihtir tih an puang.

Seng Kut Snem hi Khasi-te'n kum khata vawi khat an lawm ṭhin kut a ni a, an hnam hausakna leh ropuina huma, pholanna hun atan an hmang ṭhin. Khasi new year dawt chiaha lawm ṭhin a ni a, kumin hian November 23 khan Seng Kut Snem hi lawm a ni. Bank, office leh zirna in bakah hian KSU te hian Mairang-a post office pawh an khar luihtir a ni a, National Institute of Fashion Technology (NIFT) leh North Eastern Institute of Ayurveda and Homeopathy (NEIAH) te chu an kut hmang mek zaha, chawlh laa inkhar tura an ngen thu an tarlang bawk.

KSU president, Lambokstar Marngar chuan tute emawin sorkar thupek zawm lo a, chawlh a ni chung pawha an kal dan ngai renga kal an awm thu sawiin, hetiang tho hian kut ṭhenkhat; Shad Nongkrem, Shad Suk Mynsiem, U Tirot Singh Day, U Kiang Nangbah Day, leh U Soso Tham Day ah te pawh inhawng lui, hnathawk lui an awm ṭhin thu a sawi. Marngar chuan,"Sorkar laipui aṭanga kan thu dawn hi chu a chiang viau ṭhin a, tunah chuan state sorkar hian he lam hi a ngaihven a, hma a lak ve tak tak a ngai tawh a ni," tiin, state sorkar chu inkaihhruaina mumal tak duang a, thupek chhuahte zawm tur leh zah tura mipuite ngen tura an phut thu an tarlang.