Nagaland Hornbill Festival atan US, Colombia leh Germany thawhpui dawn

Nagaland chief minister Neiphiu Rio chuan December 1 aṭanga ṭan tur, Nagaland Hornbill Festival neih turah Colombia, Germany leh US-te an thawhpui dawn tih a sawi. Ni 10 awh festival neih tur atana inbuatsaihna hi ngawrh taka kalpui mek a ni.

Chief Minister chuan hemi chungchang hi X-ah post-in Naga heritage village, Kisama-ah review meeting an neih thu a tarlang a, he hunah hian hornbill festival bul ṭanna atana an buatsaih ni hnih awh tur, eitur leh rimawi kut chu a hawn thu a sawi bawk.

CM Rio chuan,"Ram thawhpui tur kan neihte nen hian thawhhonaa tel mipuite inkara inzawmna ṭha zawk a pian theih kan beisei a ni. America aṭanga band lo kal turte avangin kan phur tawh a, festival neih chhunga thil chi hrang hranga US-in min telpuina turah kan beiseina a sang hle," tiin, hornbill festival-a US lo tel tur chuan India tan pawh rah ṭha a chhuah ngei a beisei thu a sawi. 'Germany aṭangin rock band 'ELM Tree' te an rawn zai dawn a, Goethe-Institute/Max Mueller Bhavan, Kolkata te chuan film festival-ah German film hriat hlawh tak takte an chhuah bawk ang. Nagaland hian Investment and Development Authority of Nagaland (IDAN) te nen Germany palaite roundtable a neihpui dawn bawk a ni," tiin Rio hian a sawi bawk.

Nagaland khaw chhak lama awm, tribal pawl lian tak, Eastern Nagaland Peoples' Organisation (ENPO) chuan kar hmasa khan Eastern Nagaland Legislators' Union (ENLU) member pakuate nen meeting an neih thu leh kumin Hornbill festival-ah tel an tum thu sawiin, an aiawha cultural team tirh pawh an tum thu an puang. ENPO hian nikum khan hornbill festival hi an lo boycott tawh a, hei hi Eastern Nagaland-a tribe pasarihte tana state hran, 'Frontier Nagaland' din an phut vang a ni.

Ni 10 awh Hornbill Festival-ah hian ram dang aṭanga lo kalte nen, khualzin 70,000 aṭanga nuai 1 an tel ṭhina chhut a ni a, he kut hi Naga hnam danglamna, hausakna pholan, humhim leh chawi nun a nih theih nana buatsaih ṭhin a ni. Kut te kut (Festival of festival) tih ṭhin a ni. Festival ṭan ni, December 1-ah hian Nagaland statehood day vawi 61-na lawm a ni bawk ang.