Swadesh Darshan hnuaiah NE-a hmun 15 tihhmasawn tum

Sorkar laipui hmalakna 'Swadesh Darshan 2.0' hnuaiah North-East state-a hmun 15 te chu khualzin hipna leh tourism chawisanna atan tihhmasawn tura thlan a ni. Heng hmun thlan zingah hian Manipur aṭangin hmun pakhat leh North-East-a state dang pasarihte aṭangin hmun pahnih ṭheuh thlan a ni. Sorkar laipui chuan tourism chawikanna bakah heng lai hmun hmasawnna atan pawh a ṭangkai tur thu an sawi.

Swadesh Darshan 2.0 chungchanga thu thar hi Tourism Ministry official chuan November 21-23 chhunga Shillong-a International Tourism Mart (ITM) ṭum 11-na hmannaah an tarlang. Swadesh Darshan 2.0 hnuaia tihhmasawn tur hmun thlante chu; Arunachal Pradesh aṭangin Nacho leh Mechuka; Meghalaya-ah Shillong leh Sohra; Mizoram-ah Aizawl leh Champhai; Assam-ah Jorhat leh Kokrajhar; Manipur aṭangin Moirang, Nagaland aṭangin Niuland leh Chumukedima, Tripura aṭangin Agartala leh Unakoti leh, Sikkim aṭangin Gangtok leh Gyalshing te thlan an ni.

Ministry of Tourism hian Swadesh Darshan scheme hi siam ṭhain, an hmalakna hnuaia hna siam belh chu an tum a ni a, tualchhunga cheng mipuite tana eizawnna siam bakah hmasawnna hna thawhna hmuna culture leh leilung thilte vawn himsak chu an tum bawk niin an tarlang. He scheme hnuaiah hian tourism ministry chuan state sorkar emaw union territory emaw enkawltute hnenah tourism hmasawnna tur atana ruhrel din nan sum faia ṭanpuina a pe ṭhin.