Manipur-ah Covid-19 vaccination training nei ṭan
Manipur sorkar chuan Covid-19 vaccine a awm hun atana lo inbuatsaihin, vaccination training a nei ṭan tawh.
State immunization officer, Dr Th Nandakishwor Singh chuan vaccine semchhuah dan turah ruahmannate siam turin Health Department chuan state steering committee, state task force leh district/block level committee pawh a din tawh tih a sawi.
Dr Nandakishwor chuan, "Vaccine pekchhuah dan tur chungchangah trainer-te chu training pek ṭan an ni tawh," tiin heng trainer-te hian health worker leh staff dangte training an pe leh chhawng dawn a ni, a ti.
State level training hi zawh a ni tawh a, vawiin leh naktukah district-level training neih leh a ni ang.
State chhunga sorkar leh private healthcare facility-a healthcare worker-te hming chu sorkar laipuiin a siam, COWIN portal-ah dah luh vek a ni tawh tih sawiin, Dr Nandakishwor chuan vaccine dah ṭhatna tur 1,000 vel chu lakluh a ni tawh tih a sawi bawk.
Manipur-ah hian cold chain point 126 a awm a, heng hmunte hi state leh district level-ah uluk takin enfiah reng a ni.
Chief minister N Biren Singh chuan kar liam ta khan an state-a Covid-19 vaccine dawng hmasa turte tihfel a ni thu a sawi.
Princial secretary (health & family welfare) V Vumlunmang chuan home isolation team chu damdawi sem dan te, phone hmanga vil zui tur leh thil ṭul dangte pawh buaipui chho tura thuam chak an ni tih a sawi. Moa leh Jiribam gate-a an state-a lut leh state mi hawte thermal screening neih ṭhin chu tihtawp a ni tih a sawi bawk.