Manipur : NGO-te hnam inkara buaina tinungtu an ni : SC panel

Supreme Court-in a ruat committee chuan Manipur-a non-Governmental Organization (NGO)- te chuan Imphal-a ruang dahnaa ruang 88 dah ṭhatte chu hal ral an phal loh thu sawiin, an chet dan avangin mitthi chhungte duhdan an dodal thu leh, Manipur-a hnam pahnihte inkara buaina tinungtu an ni, a ti.

Supreme Court-in a ruat committee-ah hian Jammu & Kashmir chief justice hlui, Gita Mittal chu hruaitu niin, ruang hlawmtu nei lo 94 zinga 88 te chu an nihna hriat a nih tawh hnuah civil society pawlten an chhungte chu ruang hlawm lo tura nasa taka an nawr thu Mittal hian a sawi a, mitthi chhungte hi chuan vuina hun hman an duh tawh tih a sawi bawk.

Committee chuan chhan hrang hrang avangin NGO chuan ruang hlawm an duh loh thu tarlangin, thuneitute hnenah thil theih loh phut nan an hman bakah, hnam pahnihte inkara buaina awm chu nung reng tura duhna a awma an hriat thu te, remna awmna tur kawng dal an tum niin an tarlang. Hengte avang hian Supreme Court hmaah pawh petition theh luttute hian thu dik tawk lo an theh lut fo tiin an sawi bawk a ni.

Manipur sorkar hian ruangte phumna leh hal ralna tur hi hmun kua a thlang fel tawh a, an chhungte hnenah an duhna hmun thlang turin a hriattir a ni. Hetih lai hian NGO te chuan a ruala phum vek an rawt ve thung.

Committee hi buaina thlenna hmuna kal a, zir chianna nei tura Supreme Court-in a din a ni a, report hmasa ber theh lut tawh a ni. Tunah hian Manipur-a civil pawl hrang hrangte chu mitthi chhungte duh dan anga ruang sawngbawlna kalpui dan tur chungchangah inrawlh lo tura hriattir turin Supreme Court-ah ngenna an siam mek a ni. Hei bakah hian an chhungte'n an hlawm duh loh ruang a awm a nih chuan Manipur Municipalities Act, 1994 hmanga hun tiam chhunga thuneitute'n hal ral mai turin rawtna an siam bawk.