Meghalaya-ah tuialhthei phur lut dawn lo

North East Petroleum Mazdoor Union chuan nimin khan Meghalaya-ah tuialhthei an phurh luh tawh dawn loh thu an puang.

Mazdoor Union chuan Meghalaya-a tuialhthei phur luh an tihtawp chhan, Minister of Food, Civil supplies and cosumer affairs hnenah an thlenah Meghalaya police-te chuan November 24 aṭang khan tuialhthei phurtu driver leh a puitute chu thil dik lo tia puha kut an thlak ṭhin niin an tarlang.

Minister hnena an lehkha thehluhah hian,"Tihluihnain kan zinga mi ṭhenkhat an man a, 22 mile-a Dhaba pawna eitur nghakte pawh an man bawk a ni. Hemi hnu pawh hian police officer-te chuan mi ṭhenkhat chu an hreng zui bawk," tiin, thil dik lo tih avanga kut man an awm a nih chuan hrem an phu thu leh, thil sual dap chhuah kawnga pawi sawi ve lote'n kut an tuar tel ve zel erawh an dem thu an sawi.

Hetih lai hian Meghalaya police-te hian tunhnai khan tuialhthei ruk ching leh tuialhthei ru tura indin ruhrel felfai tak nei an man thu sawiin, hei hi national highway 6-a thleng a nih thu leh, mi 14 an hren thu an sawi a ni.