Assam-in world record 9 siam hriatpuina dawng dawn

Assam chuan Guinness Book of world records hnen aṭangin vawiin hian world record pakua siam hriatpuina leh lawmman an dawng dawn. Assam hian kumin September thla khan 'Amrit Brikshya Andolan' hmangin thing phun runpui an nei a, a rualin world record pakua an siam a ni.

Assam-in thing phun aṭanga world record a siamte chu; Thing ṭiak pot-a dah tlar thui ber, hmun khata darkar 24 chhunga thing ṭiak sem chhuak hnem ber, pawl pakhatin darkar 24 chhunga thing phun hnem ber, darkar khat chhunga team pakhat thing phun hnem ber, a ruala miin thing an phun hnem berna, Youtube live kaltlanga environment tlo zawk inzirtirna entu ngah ber, thing phun lai thalak online album-a dah hnem ber, thla khat chhunga environment tlo zawk inzirtirna hnuaia thutiam sawitu tam ber leh, pot-a thing ṭiak phun tam ber te a ni.

World record certificate hi Guwahati-a Srimanta Sankardeva Kalakshetra-a Certificate Award ceremony-ah, tlai dar 3-ah hian Assam sorkar hnenah hlan a ni ang. Ceremony-ah hian Assam chief minister Himanta Biswa Sarma chu chief guest a ni dawn a, environment and forest minister Chandra Mohan Patowary leh education minister Ranoj Pegu-te pawh an tel ang.