Meghalaya SSA teacher-ten thla nga hlawh la tawh lo

Meghalaya-a SSA (Sarva Siksha Abhiyan) teacher 13,541-te chuan thla nga chhung hlawh an la thei tawh lo tih an sawi. 

SSA school 5,166-a thawk zirtirtu 13,541-te hian August-December chhung hlawh an la tawh lo tih sawii, hei vang hian sum lamah pawh harsatna an tawk tawh tih an sawi. SSA zirtirtu zinga 5,814 hi lower Primary school-a thawk niin, upper primary school-a thawk 6,727 an awm bawk. 

Thla nga chhung zet hlawh an lak theih tawh loh avangin 'Meghalaya SSA Schools Association' (MSSASA) vawiin aṭangin 'Post Card Campaign' neih an tum a, Prime Minister Office (PMO) ah offline leh online mode hmangin an thawn dawn a ni. Hei hi sorkar laipuia Ministry of Education, DSE&L in Meghalaya hnenah centre share a pek loh avanga lungawi lohna an lantirna tur a nih thu an sawi. 

MSSASA president Aristotle C Rymbai chuan, "Hlawh kan lak loh chungchang hi thuneitute hnenah pawh kan thlen tawh a ni. December 2-a State Project Director, SEMAM-SSA nena meeting kan neih khan Director chuan Ministry of Education, SEMAM-SSA in Meghalaya hnenah centre share fund, first instalment a pek tur a la pek loh vang a ni tih a sawi a ni. Hei vang hian SSA teacher-te hlawh chu a pe thei lo a ni," a ti. State sorkar chuan Ministry hnenah hian thil ṭul leh pawimawhte pawh a thawn vek tawh a, official-te pawh ṭum eng emaw zat meeting a neihpui tawh a, mahse tun thlengin sum hi an la rawn pe lo a ni, tiin a sawi. Hei vang hian sorkar laipuiin a sum tum ve tur chin a pek chhuah thuai theihna atana nawr turin PMO lakah Post Card Campaign hi kalpui an tum ta tih a sawi a ni.