Assam-ah BJP-in UPPL leh GSP thawhpui

Bharatiya Janata Party (BJP) chuan Assam-a Bodoland Territorial Council (BTC) ah sorkarna siam turin  United People’s Party Liberal (UPPL) leh Gana Suraksha Party (GSP) te a thawhpui. 

BTC inthlan result hi Pathianni khan puan a ni. Inthlanah hian UPPL hian seat 12 lain, BJP in pakua leh GSP in seat khat an la a, Congress-in seat khat laiin, state sorkar hnuaia BJP thawhpui BPF chuan seat 17 a la a ni. Mahse BTC-ah hian BJP leh BFT hi an thawkdun lo a ni. 

BJP, UPPL leh GSP thawk hoin BTC-a sorkarna an siamah hian UPPL hotu, Promod Boro chu chief executive member (CEM) a ni ang. Assam chief minister Sarbananda Sonowal chuan CEM thar kaihhruaina hnuaiah BTC chuan thawhhona ṭha tak hnuaiah hmasawnna hna chak taka a thawh theih ngei a beisei thu a sawi. 

BTC-a ṭangrual sorkar din a nih tur thu an puan hnuah, prime minister Narendra Modi leh union home minister Amit Shah-te chuan UPPL chu lawmpuina an hlan nghal a ni. PM Modi chuan, BJP kaihhruai National Democratic Alliance (NDA) chuan hmarchhak mipuite ṭhatna turin theihtawp a chhuah zel dawn tih a sawi a, NDA-a rinna an nghah ngam avangin mipuite chungah lawmthu a sawi nghal bawk.