MHA-in Meitei hel pawlte khapna zir chiang tur tribunal din

Ministry of home affairs (MHA) chuan Meitei hel pawl ṭhenkhat, kum nga chhung atana khapna siamsakte chu khap an nihna chhanah thu chiang zawk hriat a nih theih nan zir chianna neih tumin Thawhlehni khan Unlawful Activities Prevention Act (UAPA) hnuaiah tribunal a din. Tribunal hi justice Sanjay Kumar Medhi, Gauhati High Court judge-in a ho ang.

Meitei hel pawl ṭhenkhat kum nga chhung atana khapna tihchhuah te hi; Peoples’ Liberation Army (PLA) leh an political wing, Revolutionary Peoples’ Front (RPF), United National Liberation Front (UNLF) leh an ralthuam chelek pawl, Manipur Peoples’ Army (MPA), Peoples’ Revolutionary Party of Kangleipak (PREPAK) leh an ralthuam chelek pawl, “Red Army”, Kangleipak Communist Party (KCP) “Red Army” tiha hriat bawk, Kanglei Yaol Kanba Lup (KYKL), Coordination Committee (CorCom) leh Alliance for Socialist Unity Kangleipak (ASUK) bakah an mahni aṭanga phel, an hnuaia mi leh an pawl hmalatu te an ni.

MHA thuchhuaha tarlan a nih danin, Unlawful Activities (Prevention) Act, 1967 (37 of 1967) hnuaia section 5, sub-section (1) hmanga thuneihna pek a nih angin, sorkar laipui chuan Gauhati High Court judge, justice Sanjay Kumar Medhi kaihhruai 'The Unlawful Activities (Prevention) Tribunal' chu Manipur-a Meitei pawl ṭhenkhat dan dik loa pawl dina puh leh khap tur an ni reng em tih te zir chiang turin din a ni, an ti.