AP-ah hydel project 13 thawk mek

Union power minister, RK Singh chuan Arunachal Pradesh-in Megawatt 13,000 pe chhuak tur hydroelectric project kal mek 13 an neih chu an chhawr ṭangkai tur thu leh, zawh a nih hunah chuan Rs. vbc nuai 1.4 sum an lak luh theih tur thu a sawi.

RK Singh hian Arunachal Pradesh leh Assam inrina bula Subansiri lower hydroelectric project, Megawatt 2000 pe chhuak thei tur sak mek chu tlawhin, hydroelectric project 13 thawh mekte chu state-in a chhawr tur thu hi a sawi a ni. Minister chuan hydroelectric project aṭanga sum an lak luh theih tur chu state sum lak luh tipungtu tur a nih thu sawiin, Subansiri-a hna thawh mek chu lawmawm a tih thu a sawi bawk. "Ni zung chakna leh thli chakna hmangin hman nawn theih energy siam thei mah ila, tui (hydro) tel lo chuan engtik lai pawha mamawh energy siam hi a harsa a, tunah hian tui hmanga energy kan neih theih chu tihpunin a awm mek a ni," a ti.

Minister hian hydro power hmanga energy siam chhuah ni mek zat chu 47,000 MW a nih thu leh, chu chu hydro power energy kan neih theih aṭanga 35% chauh a nih thu tarlangin, ram changkang zawkte chuan hydro energy 70% aṭanga 80% an neih theih thu a tarlang bawk.

"Kum 2030-ah chuan India power mamawh zat pawh a letin a pung tawh anga, unit tld 3,000 chuang kan mamawh tawh ang, hei vang hian tuna hydro power tam zawk siam thei tura kan inbuatsaih hi a ṭul a ni. Nikum nena khaikhinin, August, September leh October thla chhunga India-in power kan mamawh zat chu 20%-in a pung a ni. Tun hma chuan power-a intodelh lo ram niin, tunah chuan sorkar hian kum kua leh a chanve chhungin MW nuai 1.9 a siam chhuah belh tawh a ni" tiin a sawi.