Tripura : BJP-in constitutional amendment 125-na siam vat an duh

Tripura-a Bharatiya Janata Party (BJP) chuan Parliament-a 125th constitutional amendment chu pawm vat an duh thu sawiin, Tripura tlang ram leh phaia chengte inkara inrem lohna thlentu chinfelna tur kawng a nih thu an sawi.

BJP tribal wing, Bharatiya Janata Janjati Morcha chuan Bodoland Territorial Council tih anga Tripura Tribal Areas Autonomous District Council chu Tripura Tribal Areas Territorial Council-a dahsan an duh thu an sawi a, hei hian central aṭanga fund lo kal chungchangah hmun ṭhenkhat ngaihsak ngai bikte'n an hlawkpui theih tur thu an sawi a ni.

TTAADC-a opposition leader leh BJP hruaitu hlun, Bimal Chakma chuan Ministry of Home Affairs-a North east advisor, AK Mishra nen an inkawm thu sawiin,"Tunah hian meeting-a tel BJP hruaitute chuan constitutional amendment 125-na pawm vat hi an phut a, hei hian sum leh pai bakah, khawtlang ang pawhin TTAADC tan kawngro a su thui thei hle dawn a ni. Tripura assembly pawhin he thu hi a pass tawh a, sorkar laipui pawh he bill pass tur hian a nawr chhunzawm bawk, official-te pawh Parliament session lo awm tura pharh a nih theih nan MHA-a thlen turin kan nawr ve bawk a ni," a ti.

Hetih lai hian TIPRA Motha leh MDC hruaitu, Pradyot Kishore Debbarman chuan 'Greater Tipraland' neih ṭulna sawi lianin, state sorkar thuhnuaia awm lo inrelbawlna hran neih a ṭul thu a sawi. "Kan duh chu chiang takin kan sawi tawh. Gretater Tipraland kan duh thu hi India sorkar pawh kan hriattir tawh a, chhana min pek hun ka nghak a ni. India sorkar hian thil ṭha zawk min pek tur an neih chuan kan la ngaihtuah ṭha leh ang chu," tiin a sawi ve bawk.