Manipur-ah Naga hruaitu pualin park siam dawn

Manipur-a Tangkhul Naga Society Delhi (TNSD) leh Hongmanh khaw mipuite chuan an khuaa Naga hruaitu, Rungsung Suisa thlanah amah hriatrengna pual park siam an tum.

TNSD president, AC Kharingpam chuan Naga khawtlang tana tha a thawhna leh ṭhangtharte zinga a hming chawi lar zel a nih theih nan Hongmanh khaw mite leh TNSD te'n Rongsung Suisa thlan awmnaah hian park siam tum an nih thu a sawi.

Rongsung Suisa hi politician hmathlir nei ṭha tak a nih piah lamah kohhran dintu pawimawh tak a ni a, Naga khaw hrang hrangah pastor leh missionary angtein a thawk fo ṭhin a ni.Naga National Council (NNC)-ah vice president a ni ṭhin a, India leh Nagaland sorkar inrem theihna tura remna palai hna thawktu a ni bawk. Ukhrul district, Somdal khuaa piang a ni a, Hongmanh khuaa Mount of Mirror an tih, Kala Kaphung-ah phum niin, helaia phum hi ama duhdan a ni. Suisa hian phum a duhna lai hmun hi Meitei leh Naga te inrina tur atan a duh niin Kharingpam hian a sawi. Hongmanh khuaa hriatrengna park siam tur hi phase hrang hranga thawh a ni dawn a, phase khatnaah hian bang siam bakah a thlan aṭanga ṭawngṭaina in kalna tur kawng siam hna thawh a ni ang.