Tripura-a zirtirtu bante'n Nawrh an la chhunzawm zel

State education minister Ratan Lal Nath chuan zirtirtu ban takte hi sorkarin post thar 9,000 a siamah dil turin a ti a, mahse hei hi nawrh huaihawtte hian an duh lo a ni. Zirtirtu ban takte hi an vaiin 10,323 an ni.

Minister chuan interview hmachhawn loin appointment siam ngawt theih a nih loh avangin nawrh huaihawt mekte hi post thar siamah hian interview hmachhawn leh phawt tura a duh thu a sawi. 

Tripura-a BJP-IPFT ṭangrual sorkar chuan Supreme Court leh high court thupek avanga zirtirtu aṭanga ban takte hi a khawngaihin an harsatna pawh a hriatthiampui hle tih sawiin, Nath chuan hei vang hian state sorkar chuan Group C leh D-ah post thar 5,000 leh zirtirtu post 4,000 a siam thar a ni, a ti. Heng post siam tharte hi zirtirtu ban takte hian dil a, interview an hmachhawn chuan a tam zawk chuan hna an hmu leh ngei dawn a ni, a ti bawk. Hemi rual hian interview paltlang lo te tan pawh sorkar chuan ruahmanna dang a siam thei tih a sawi a, hei erawh hi chu puanzar chi a ni lo niin a sawi.