NMC-in Manipur-a medical zirlai tlanchhiate tan ruahmanna siam

National Medical Commission (NMC) chuan Manipur sorkarin a ngen ang leh sawipuina an neih hnuah, Manipur tualchhung buainain a nghawng, medical zirlai, mahni in leh lo tlansan avanga an zirna chhunzawm thei lote chu online-in emaw Churachandpur Medical college (CMC)-ah emaw an zir zawm a phalsak.

NMC chuan buainain a nghawng Manipur-a medical college pali aṭanga zirlai raltlante tan he hmalakna hi kalpui an nih thu sawiin,"Heng zirlaite tan hian exam pawh Churachandpur medical college-ah vek hian neih tur a ni ang a, attendance an tlin lohna leh internal assessment an neih ṭhat lohnate chu special class hmanga siam remsak tur an ni," tiin an tarlang. NMC chuan tuna ruahmanna an siam hi harsatna chinfelna lailawk mai a nih thu leh, zirlai thawn chhuah emaw, insawn chhuahna emaw a nih loh thu an sawi bawk.

Manipur sorkar hian CMC, Jawaharlal Nehru Institute of Medical Sciences (JNIMS), Regional Institute of Medical Sciences (RIMS) leh Shija Academy of health Scienes in Manipur-a medical zirlai, tualchhung buaina avanga tlanchhia, an zirna chhunzawm thei lote tan an zirna an chhunzawm theih nan ruahmanna siamsak turin Union Health Ministry leh NMC hnenah hian ngenna a lo thlen tawh a ni.