Manipur : UNLF leh sorkarin inremna ziak

Manipur valley-a innghat hel pawl lian leh upa ber, United National Liberation Front (UNLF) leh Manipur sorkar chuan Nilaini khan inremna an ziah thu an puang. UNLF hian India-in zalenna a hmuh tirha India hnuaia Manipur a lut tur duh loin ram inrelbawlna hran ngiatin ralthuam nen central leh state sorkar lakah an hel a ni.

Inremna thuthlung ziahah hian sorkar laipui chuan UNLF hi valley-a innghat tiin a tarlang. UNLF ang tho hian hill area-a innghat hel pawl 25 te nena inremna Suspension of Operations (SoO) ziah tur buaipui mek a nih thu sorkar laipui chuan a sawi bawk. Union home minister Amit Shah chuan inremna ziah a ni thei chu prime minister Narendra Modi-a'n North East hmasawnna tura a hmalakna vang a nih thu a sawi.

UNLF hi kum 1964-a din a ni a, 1990 khan ralthuam nena an hnuaia che pawl, Manipur Peoples' Army (MPA) an nei leh a ni. India aṭanga chhuaha rorelna hran neih chu an tum ber a ni a, China nena thawh dun an tum bakah Myanmar-a Kabaw valley lak let leh pawh an tum bawk. An hruaitu, social activist, RK Meghen chhuah hnuah phel mah se, pawl lehlam ve vete hian mi leh sa 500 vel leh ralthuam 500 chuang an nei ve ve nia hriat a ni. Manipur valley district zawng zawng; Imphal East, Imphal West, Thoubal, Bishnupur, Jiribam leh Kakching bakah, Kuki leh Vaiphei tamna hill district velah te an chetla ber ṭhin a ni. UNLF hruaitu hlun pakhat chuan inremna ziak tura sorkarin a tiam thilte chu an pawm thu sawiin, an mi leh sa 400 chuangte chuan inremna ziah chu an pawm vek thu a tarlang bawk. Hetih lai hian UNLF aṭanga phel pakhat zawk pawhin, inremna ziah chu an duh ve nia sawi a ni bawk.