AP : US ambassador-in war museum hawng

India rama US ambassador, Eric Garcetti chuan Arunachal Pradesh tlawhin, chief minister Pema Khandu nen East Siang district-a Pasighat khuaah 'The Hump WWII museum' an hawng. Museum hi Indopui II-na laia Allied pawl thlawhtheihna khalha thite tana buatsaih niin, hetiang museum hi Asia-a a pahnihna a ni.

Garcetti hian museum hawnna hunah hian thu sawiin,"Vawiinah hian sulhnu chhui kir tur ni loin, sulhnu ṭha hnutchhiah turin kan lo kal khawm a ni. Thil thleng tawh hretu leh hmutu ni mai loa kan hma hun kan thunun theih nan kawng zawng tur kan ni," tiin, director Oken Tayeng hnuaia museum team-te leh India sorkar leh Arunachal Pradesh sorkar hmalakna chu lawmawm a tih thu a sawi. 'The Hump' hi Arunachal tana thilpek a ni mai lo a, India leh khawvel tana thiltih, India leh US inkara inzawmna pawt hnaitu a ni, a ti.

Chief minister Pema Khandu pawhin thu sawi ve bawkin, 'The Hump' chu Arunachal mipuite'n indopui pahnihna laia an nunna chan tate hriatreng nana an buatsaih a nih thu sawiin, museum chu an sulhnute humhimna a nih bakah ṭhangtharte tana allied force-te huaisenna leh, zalenna leh democrcay hum tura an beihna hriattirtu a nih fo theih a beisei thu a sawi bawk. He hunah hian Khandu chuan Indopui II-na laia thlawhna tla, thil tam tak an hriat theihna tur awmna hmun 30 te a tarlang tel bawk.

'The Hump' tih hian Assam aṭanga China-a Yunnan kalna thlawhtheihna kawng sawina a ni a, tlang sang tak tak kara thlawhtheihna khalh a ngaih avangin hmun hlauhawm tak a ni. Kum 1942 aṭanga 1945 chhung khan sipaite chuan an mamawh inpekna kawng atan an hmang a ni. Heng lai hmunah hian US lam mi thlawhtheihna khalhtu chin hriat loha awm tam tak an awm. Kum 2016-2017 chhung khan US defence POW/MIA accounting agency te chuan ruang 400 hmuh tumin beihpui an thlak tawh a ni.