Nagaland : Hornbill festival ṭan a ni ta

Nagaland chuan ni 10 awh tur, Hornbill festival chu an ṭan ta.

Festival hawnna hi Kohima bula Naga heritage village Kisama-ah neih a ni a, kumin hornbill festival thupui atan hian 'Cultural Connect' tih hman a ni.

Festival ṭan a nih hma hian zing dar 8 leh a chanveah statehood day hman a ni a, hemi hnu hian Kisama Main Arena-ah Hornbill festival hawnna neih a ni. Tribal guest atan hian Pochury tribe-a mi, Shri Monte Chupa thlan a ni a, ani hi Iikeagho khaw hotu a ni a, Chupa hi hotu tihna niin, a pa aṭanga a chhawm a ni.

Hornbill festival ni khatnaah hian kut themthiam thil chi hrang hrang pho chhuahna tur hawnna neih a ni a, hemi hnu hian hornbill cafe leh hostiscape te hawn leh niin, huan leh lo aṭanga thar thlai te phochhuahna tur hawn a ni bawk. Tlai lam dar 4-ah WWII museum buatsaih archive section tlangzarhna neih chhunzawm a ni a, Department of Planning and Transformation hmalaknain Kisam-ah hian Sustainable Develpment Goals (SDG) one stop destination enhona neih a ni bawk. Tlai lamah Hornbill international photo fest leh vlog contest 2023 te neiin, Kisama Imagi.Land-ah kids carnival buatsaih a ni bawk a ni. Hornbill festival ni khatna hman a nih rual hian Nagaland state rural livelihood mission hmalaknain Amphi Theatre-ah Regional Saras fair vawi 7-na hman nghal a ni bawk.

Nagaland hornbill festival hi December 10 thleng neih tura ruahman a ni a, festival neih chhung hian ennawm leh chhim tur thil chi hrang hrang buatsaih a nih bakah Miss hornbill international thlanna te, Naga chef season 10, music festival, Nagaland literature festival bakah Great hornbill run te buatsaih a ni dawn a ni. Infiamna lamah pawh intihsiakna hrang hrang neih a ni bawk ang. Hornbill festival neih chhung hian zan lamah free concert neih a nih ziah dawn a, dar 5-ah ṭanin zan dar 9:30 thleng neih a ni ṭhin ang.