Meghalaya-a ILP hmanna turin nawr chhunzawm tum

Meghalaya-a National People's Party (NPP)-in 2024 Lok Sabha MP candidate atana a ruat, Dr Mazel Ampareen Lyngdoh chuan an state-a Inner Line Permit (ILP) hmang tura an ngenna siam tawh chu nawr chhunzawm zel an tum thu leh, hemiin a nghawng turte zawng zawng nena an thutlukna aṭanga tawlh lo tura sawihona an neih tawh thu a sawi.

Amarpaeen Lyngdoh chuan,"Tunah hian Tura MP nen kan thawk dun dawn a, boruak kan siam dawn a ni. Thutlukna an siam ngei ngei theihna turin hma kan la ang. Parliament rorelnaah thu sawiin kan tawp mai dawn lo a, ILP hman chungchang hi sawihona thupui ber a nihna turin kan bei ang," tiin a sawi. "Party ramri kal kanin tunah hian kan chet chhuah a ngai tawh a ni, hemi ti tur hian party aiawha ka che chhuak thei a nih chuan ka tan chawimawina a ni ang," tiin Meghalaya-a ILP hmang tura agenda nawr a tum thu a sawi.

Lyngdoh hian zirna in kaihhnawihah eiruk thubuaia CBI-in amah an chhui zui mek chungchang chu sawi zui bawkin, amah beitute chu bei let tura a inpeih reng thu leh, thubuai chu court-a ngaihtuah mek a nih thu leh, sawi lo neih ve chu a rem rih loh thu a tarlang bawk.