Manipur-ah Myanmar raltlan 1,300 awm mek

Manipur-a Kamjong district thuneitute chuan an huam chhungah Myanmar aṭanga raltlan mi 1,300 an awm mek niin an sawi. Kamjong hi Manipur leh Myanmar ramria awm a ni a, Kamjong bakah hian district dang pali - Churachandpur, Chandel, Tengnoupal leh Ukhrul te chuan Myanmar nen hian ramri an inṭawm bawk.

Kamjong deputy commissioner, Rangnamei Rang Peter chuan,"Tunah hian Myanmar aṭanga raltlan mi 1300 kan kawl mek a, Phaikoh, Human Thana, K Ashang Khullen Aze, Namlee leh Wanglee khuaah te an awm hlawm a ni. November 29 thleng khan mi 782 te biometrics kan laksak tawh bawk," tiin a sawi. Myanmar ramri hi Assam rifles te'n an vil mek a, ramri kan tur an veng ṭhin a ni. District thuneitute chuan ramri ṭhen nana a hungna engmah siam a ni lo chu harsatna a tlin thu sawiin, Myanmar lam aṭanga lo lut duhte tan a awlsam phah thu an sawi.

Myanmar sipaite leh hel pawl pakhat inbeihna avangin raltlan an pung thar a, kumin July thla pawh khan Myanmar mi 718 te chu Manipur-a raltlanin, New Lajang, Yangnomphai sawmil, yangnomphai. New Samtal, Bonse, Aivomjang leh Lajang velah te an khawsa a ni.