Guwahati aṭangin Bangkok direct-in thlawh theih tawh dawn

India leh Thailand inkara thlawhtheihna hmanga inkalpawhna chuan Thai Air Asia hmalakna hnuaiah hmasawnna hmuin, Guwahati aṭanga Bangkok direct-a thlawhna tur ruahmanna thar an siam.

Ruahmanna thar tlangzarhna hi Lokpriya Gopinath Bordoloi International Airport, Guwahati-ah neih a ni a, he hunah hian Assam Skill Development Mission Director, Ankur Jain te, Chief Airport Officer, (Guwahati Airport) Utpal Baruah leh Wuitchuni Kuntapeng bakah, Thai Air Asia, Bangkok Chief Executive Officer leh Shri Shyam Malani, Director, Indo Thai, Guwahati te an tel a ni.

Thai Air Asia thuchhuaha tarlan a nih danin, India rama tourism industry chu a ṭhan hret hret thu leh, an company-in December 1 aṭanga ṭanin, Nilaini, Zirtawpni leh Pathianni apianga Bangkok, Don Mueang leh Guwahati inkar direct-a thlawhna tur ruahmanna an siam thu an tarlang. "Thailand aṭanga kalte chuan Northeast India hmun thianghlim tak mai hmuhna tur remchang an neih dawn bakah, India aṭanga chawlh hmang tura Thailand kal tumte pawhin awlsamna nasa zawk an neih theih phah dawn a ni," tiin Thai Air Asia te chuan an tarlang bawk.

Head of Commercial Air Asia Thailand, Tansita Akrarittipirom chuan Don Mueng - Guwahati thlawhtheihna kawng thar chu huphurhawm mah se a lawmawm a tih thu sawiin,"Hei hi India leh Thailand inkara Thai Air Asia thlawhna kawng pakuana chiah a ni. A hmain Kolkata, Chennai, Jaipur, Bangalore, Gaya, Lucknow leh Ahmedabad te kan nei tawh a, India market ṭhanna nasa tak entirtu leh Air Asia tana kawng thar hawn belhna tur a entir a ni," a ti. Nakin zelah chuan he thlawhtheihna kawng hian Singapore a pawh chhunzawm bakah, Vietnam, Malaysia leh Indonesia kalna turte pawh a la hawn beisei a ni.