Manipur-a mobile internet khapna hlip

Manipur tualchhung buaina thleng avanga hun rei tak state puma mobile internet khapna chu Pathianni aṭang khan state chhung hmun tam zawkah hlih a ni a, December 18 thleng khapna hi hlih a ni phawt ang.

Commissioner (Home) T Ranjit Singh chuan thuchhuah siamin, state chhunga dan leh thupek dinhmunte'n ṭhat lam an pan chhoh zel avang leh, mobile internet khap avanga mipuite'n harsatna an tawh dante thlirin, state sorkar chuan khapna hi hlih a rel ta a ni, a ti.

May 3-a Meitei leh Kuki hnam inkara buaina a chhuah hnu khan state sorkar chuan buaina punlun zel tur venna atan state pumah mobile internet service hi a titawp nghal a ni. Hun rei tak an khap hnuah September 23 khan hawn a ni a, mahse, hemi chhung hian inhuatna chawk tho thei thlalak leh thusawi, video thlenga thehdarh chhoh a nih avangin September 26 khan a khap zui leh nghal a ni.

Hmun tam zawkah mobile internet service khapna hi tihtawp ni mah se, Chandel leh Kakching, Churachandpur leh Bishnupur, Churanchandpur leh Kakching, Kangpokpi leh Imphal West, Kangpokpi leh Imphal Esat, Kangpokpi leh Thoubal bakah Tengnoupal leh Kakching inrina laiahte chuan khap chhunzawm a la ni ang.

Manipur tualchhung buaina chhuak avang hian mi 182 in nunna chanin, mi 50,000 chuang himna zawngin an tlanchhia a ni.