Assam : Ruihhlo zuar leh police-te inkahnaah mi 1 thi

Assam-ah ruihhlo zuarte leh police-te inkahna thlengah mi pakhat a thi a, hliam panga an awm.

Kamrup additional superintendent of police, Kalyan Kumar Pathak chuan ruihhlo phurtu motor a kal tih information an dawn avangin Agiathuri-ah police checkpost an siam a, motor hi ding tura an tih chuan tlan chungin motor chhung aṭangin silaiin an rawn kap ta mai niin a sawi. Police-te chuan kap letin an motor hi an um zui nghal a, an inkahnaah ruihhlo zuar zinga pakhat hi an kap hlum a, mi dang pahnih pawhin an kap hliam tih a sawi. Hetih lai hian police constable Hima Das pawh silaia kah fuh niin a hliam a, an inkahna bula awm tualchhung mi pahnihin hliam an tuar bawk. Hliam tuarte hi private hospital-ah hruai nghal an ni a, a hnuah Gauhati Medical College and Hospital-ah sawn leh an ni.

Pathak chuan police team hian motor an umzui aṭang hian ruihhlo an dahna bag an man tih a sawi bawk.