Meghalaya sorkarin Punjabi Lane-a chengte meeting neihpui dawn

Meghalaya sorkar chuan Punjabi Lane are, Shillong-a chengte chu an insawn chhuahna tur chungchang sawipuiin December 7 hian meeting a neihpui dawn.

State sorkar hian September 29 khan High Court-ah Punjabi Lane area-a cheng, chhungkaw 342-te chu Shillong municipal board ramah sawn chhuah rawtna a lo theh lut tawh a ni. Hetih lai hian chhungkaw sawn chhuah turte hian state sorkar chu an chenna tur in sa phawt turin an phut thung.

Urban development authority-a senior official chuan Punjabi Lane-a chengte, Harijan Panchayat Committee (HPC) nena meeting neih hun tur chu tihfel a nih tawh thu leh, an inhriatthiam lohna neihte pawh an chinfel theih ngei tawh a beisei thu a sawi. HPC lam hian a hmaa sorkar ruahmanna lo siam tawhte chu siam ṭha turin an phut a, hemi hnu hian state sorkar chuan an ngen angin chhungkaw tana ram pek zat chu a tihzauh belh thu an sawi. Punjabi Lane-a chengte hi kum 200 liam ta vela British-hoin hna thawk tura Punjab aṭanga Shillong-a an hruai thlah kal zelte an ni.

Kum 2018 May thla khan Punjabi Lane-ah hian Khasi leh Sikh-te inkarah buaina a chhuak a, hei vang hian thla khat chuang chu helai hmunah hian curfew puan a lo ni tawh a ni. Hemi hnu hian sorkar chuan he biala chengte chu enfiah hna hi thawkin, dan loa awmte hmun danga sawn chhuah dan tur a ruahman ta a ni.