Sikkim : Chin hriat loha awmte death certificate tichhuak dawn

Sikkim sorkar chuan October 3-a Lhonak Lake-a tui lian nasa thleng avanga chin hriat loha awm, mi 77-te death certificate a pe chhuak dawn.

Chief secretary VB Pathak chuan hun rei tak zawn an nih hnuah mi 77 te chu tun thlengin an chin hriat a la ni lo a, state dang - Uttarakhand leh Himachal Pradesh-te'n an lo tih dan angin state sorkar chuan chin hriat loha la awmte hi an thi tawhah puangin, an chhungte hnenah death certificate hi a pe chhuak dawn a ni, a ti. Death certificate la chhuak tur hian an chhungte chuan FIR/Missing Person Report chu an chenna biala police station-ah thawnin, record turin an chhungte chuan an bo a ni tih an file ve leh a ngai dawn a ni. A buaipuitu officer-in a enfiah hnuah, newspaper-ah Hindi leh English-in chin hriat loa awmte list hi an chhuahtir ang a, sorkar website-ah tarlan a ni bawk ang.