Manipur : Helpawl dangin sorkar inremna ziahpui ve leh

Manipur-a helpawl hmasa ber tia sawi, United National Liberation Front (UKLF)-in state sorkar leh central sorkar nena inremna an ziah hnuah, Thawhṭanni khan Meitei helpawl pakhat, National Revolutionary Front Manipur (NRFM) chuan sorkar laipui nen inremna an ziak ve leh.

NRFM hi United Revolutionary Front tih ṭhin a ni a, September 11, 2011-a din niin, Kangleipak, Communist party leh Meitei Underground member ṭhenkhatte'n an din a ni. NRFM mi leh sa 25 te chuan, an hotu, Major Boicha kaihhruaiin inremna ziah duhin an inpe a ni. "He inremna hmang hian an pawl mi leh sa tam zawkte chuan remna kawng an zawng a ni tih a lantir. Inremna hian India sorkarin Manipur-a remna leh muanna zawnga hna a thawhna kawngah beiseina thar a siam ngei bawk dawn a ni," tiin Union Home Ministry chuan NRFM nen inremna an ziah chungchang an tarlang. "An hruaitu hlun tak takte hi ṭhenawm ramah awmin an awmna hmun aṭang hian helna an kalpui a, Manipur-a buaina chhuakah pawh khan an inrawlh ngei a ni. Kan thlen tawh chin aṭang hian Meitei underground dangte pawhin inremna hi an rawn ziah ve duh phah rin a ni a, chu chuan Modi-a hmathlir, hmarchhaka helna awm lohna leh ṭhang duang tak dinna chu a tihlawhtling thei dawn a ni," tiin an tarlang bawk.

Sorkar laipui hian Manipur-a helpawl hmasa ber tia an sawi ṭhin UNLF nen hian kar hmasa khan inremna an lo ziak tawh a, inremna hi UNLF aṭanga phel, Pambei faction an tihte nena ziakin, anni hian mi leh sa 65 an nei nia hriat a ni. UNLF aṭanga phel lian zawk, KH Achou Singh kaihhruai, Koireng tiha hriat chuan mi leh sa 300 an la nei niin official-te chuan an sawi.