Sikkim : Hnam 12-te'n tribal status dilin Delhi-ah kawng zawh dawn

Sikkim-a hnam 12 te aiawh, Eleven Indigenous Communities of Sikkim (EICOS)+1 tiha hriatte chuan December 3 khan Gangtok-ah awareness programme hmangin sorkar laipui hnenah hnam 12-te tana tribal status pe tura phutin Delhi-ah kawng an zawh dawn a, Sikkim chief minister Tamang Golay chuan a telpui dawn a ni.

EICOS+1 convener, Raju Basnet chuan,"May 8, 1973-a inremna siam ang leh, India cosntitution-a article 371F kan neih angin, heng hnamte chanvo leh beiseite tihnun a nih leh theih nan vawiina resolution kan neih hi siam kan ni. Ethnographic report kan theh luh tawh leh article 371F ṭan chhanin, kan resolution hi Parliament winter session-ah put luh ngei a nih kan beisei a, tribal nihna pek ngei kan nih kan beisei bawk," tiin a sawi. EICOS+1 resolution-ah hian,"Sikkim-a hnam zawng zawngte chuan Chogyal hunlai aṭanga India-in tribal-te tana seat reservation, job reservation leh khawtlanga hamṭhatna a siam leh ruahmante inang tlangin an nei tur a ni tih a ni. India hnuaia Sikkim a luh hnuah pawh heng hnamte tan hian kum 1979 thleng khan tribal nihna leh an chanvo te an nei a, seat reservation tihhniam a nih hnuah erawh an hamṭhatna neihte a tlanhniam chho a ni," tiin an tarlang.

Hnam 12 aiawhte hi CM hian a kaihhruai dawn a, an vai hian TN Dhakal kaihhruai committee-a mi te nen tiamin mi 18 an ni dawn a ni. Basnet chuan,"Inthlan neih kumah hian party hruaitu zawng zawngte hian an mit leh beng an chhi a, an inhawng a, tuna kan kawng zawh tur pawh hi mi zawng zawngin kan duhna leh kan thil phutte an hriat theih nana ti kan ni," tiin, kum 2024 inthlan hma ngeia hetiang boruak siam an nih thu a tarlang bawk.