Manipur leh Myanmar ramria inkahnaah mi 13 thi

Manipur Tengnoupal district-a Leithao khuaah nimin khan inkahna thlengin mi 13-in nunna an chan. He khua hi Manipur leh Myanmar inrina bul, ramri aṭanga km 10 chiaha hlaa awm a ni. Mitthi ruangte hi Jawaharlal Nehru Institute of Medical Sciences (JNIMS), Imphal-ah lak a ni.

Manipur police-te chuan thubuai ziah luh nghal a nih thu tarlangin,"4.12.2023 zan khan Saibol khaw bul, Leithao khuaah silaia inkahna thlengin, misual ralthuam nei niin hriat an ni. He lai hmun hi Machi police station hnuaia awm a nih angin district police leh security mi leh sate chuan a hmun hi an thleng nghal a ni. Thubuai ziah luh a ni a, chhui zui nghal a ni ang. He inkahnaah hian mi 13 an thi a ni," tiin an tarlang.

Ruangte hi JNIMS-ah post mortem niin mi 13 zinga 11 te chu an nihna hriat a ni tawh a, an vai hian Imphal Valley-a cheng niin police-te chuan an sawi. An zinga naupang ber hi kum 17 mi niin, a upa ber hi kum 47 a ni thung. Inkahnaa inhnamhnawihte hi tute nge an nih hriat a la ni lo.