Tripura House-ah Yusuf Commission report khel chhunzawm

Tripura Assembly budget session neih mekah Health Minister hlui Bimal Sinha thah chungchanga Yusuf Commission report chuan sawizui a hlawh hle a, opposi-tion Congress MLA te chuan session neih mek chu tihtawp an phut a ni.

House-ah hian Zero Hour hun hman a ni a, hetah hian Opposition leader Sudip Roy Barman chuan Justice MA Yusuf kaihhruaina hnuaia Sinham thih dan chhuitu tur, judicial inquiry commission March 31, 1998-a din chu tihtawp a phut thu a au chhuahpui a ni. Assembly Speaker Ramendra Debnath chuan House-ah sawi chhuak rih lo turin a ngen a, hei hi eptuparty lam chuan duh loin, House an chhuahsan a ni. Rorel lai CPI(M) chu Sinha thah a nih chungchangah hian inrawlh ngei niin eptu lam chuan an ngai a, kum tam tak liam hnu pawha chhui chhuah a la ni lo chu an hrethiam lo a ni.

Speaker chuan session chu darkar chanve titawp lailawkin, dar 12:40 pm-ah ṭan leh a ni. Mahse inkhawm chhunzawm hnuah pawh opposition lam chuan Yusuf Commission report chu sawiho phutin bengchheng an siam zui zel a ni. Tlai dar 2-ah rorel inkhawm chu tihtawp leh a ni a, speaker chuan Yusuf Commission report chu session tawp ber ni April 7-ah House-ah sawiho a nih tur thu a puan hnuah session chu neih chunzawm leh a ni.

Health Minister hlui Bimal Sinha thihna hian sawi zui a hlawh hle a, National Libera-tion Front of Tripura te nen inkungkaihna ṭha tak nei nia sawi te pawh a awm. A thihna-a inhnamhnawih nia rinhlelh an man zinga 27 te chu chhuah zalen an ni a, High Court chuan thiam lohna an neilo niin a ngai. National Liberation Front of Tripura (NLFT) mi leh sa
ṭhenkhat chu sorkar quarters-ah stipend dawngin an khawsa niin an sawi bawk a, hei hian chiang takin NLFT te chu Bimal Sinha thahna ah hian an inhnamhnawih tih a tichiang a ni, tiin Barman chuan a sawi.

Justice MA Yusuf hnuaia Sihna thihna chhuitu judicial inquiry commission chuan kum 2000 khan report chu sorkar hnenah a pe tawh a, sorkar chuan mipuite hriatah a puangzar lo thung. Tripura High Court chuan tunhnai khan report hi mipui hriatah puangzar turin thu a pe a, sorkar lam chuan Assembly budget sesssion-ah tlangzarh a nih tur thu an lo sawi tawh a ni.