Sorkar siam leh inring Gogoi

Assam state Chief Minister leh Congress hruaitu ni bawk Tarun Gogoi chuan an state assembly inthlan hmachhawn turah sorkarna an siam leh ngei a rin thu a sawi.

Gogoi chuan, kum 2014-a Lok Sabha inthlanpui neih khan thil thui tak a nghawng niin a sawi a, Assam mipuite chuan Congress party-ah rinna an la nghat a ni, a ti. Hei bakah hian tunhnaia Rajya Sabha member thlanna-a hnehna an chang chuan inrin tawkna nasa tak a siam thu a sawi bawk.

CM hian Bokajan-a an party rally-ah thu sawiin, Modi-a kaihhruai sorkar laipui chuan India ram state hrang hrangah dik lo takin thuneihna a hmang mek niin a sawi a, Arunachal Pradesh leh Uttarakhan state-a President's Rule a puandan te chuan mipuite a barakhaih hle a ni, a ti.

Heng state pahnih te hi Congress sorkarna a ni a, a bik takin Modi-a sorkar chuan a bei niin a sawi bawk.

BJP chief ministerial candidate Sarbananda Sonowal leh party hruaitu hlun Dr Himanta Biswa Sharma te chu tualthah thubuai nei niin Gogoi chuan a sawi a, Bora thah a nih chungchangah khan an inhnamhnawiih niin a sawi a ni.