BJP-in dan loa Assam-a lut tihtawp tum

Bharatiya Janata Party (BJP) president Amit Shah chuan Assam state-ah Bangladesh
aṭangin dan loa lut an tam thu a sawi a, hei hi sorkarna an siam thei a nih chuan titawp a nih tur thu a sawi.

Amit Shah chuan Assam mipuite chu sorkar thar siam turin a sawm a, sorkarna an siam thei a nih ngat chuan hun rei tak ata an state buaina lian tak pakhat, Bangladesh aṭanga dan loa ram chhunga lutru te chu dan a tiam a ni.

BJP president hian Lakhim-pur district-a Naoboisa-a party rally a hmanpuina-ah thu sawi-in, Congress party-in kum 15 chhung zet sorkarna a chelh chuan hmasawnna tak tak a kalpui lo niin a sawi a, mipuite chu sorkar thar siam turin a sawm a ni. Congress sorkar rorelna hnuaiah eirukna a hluar hle tih sawiin, hei hi state chuan nasa takin a tuar a, tunah hian Assam chu a hnung tawlh mek a ni a ti.

Assam-a sorkar lai chuan Bangladesh atanga dan loa lutte vote duh vangin a hum niin a sawi a, chu chu BJP-in sorkarna a siam a nih chuan titawp a ni ang, tiin BJP hotu chuan a sawi.

Amit Shah hian Assam a tlawh ṭum hian vantlang inkhawmah vawi eng emaw zat thu a sawi a, rorel lai Congress chu nasa taka beiin, hmasawnna daltu ni hialin a sawi nghe nghe. Amit chuan Assam-ah hian lui lian tak tak a luang chungin mipuite chuan tui thianghlim intur an neih loh thu te, ṭhalai hnathawh tur neilo an punchak thu te,India rama state hmasawn tak a nih thin thu leh Congress a sorkar hnua-ah an hnung tawlh thute a sawi a ni. Tuna Assam state dinhmun chu India ram state zingah pawh a ngaih-tuahawm ber te zinga mi a nih tawh thu leh sorkar thar din a ṭul tawh tak zet thu a au chhuahpui a ni.

BJP party president hian Assam a cham chhung hian an party manifesto 'vision document' a tlangzarh a, an party hmachhawp hrang hrangte mipui hriatah a puangzar a ni.