India-a state him berah Sikkim puang

National Crime Records Bureau (NCRB)-in India crime rate report 2022 a tihchhuahah India rama state zingah Sikkim chu state him ber niin an tarlang. Sikkim hian kum 2022 chhung khan tualthah thubuai pakua chiah an nei.

Tualthahna a tlem bakah pawikhawihna dang chungchangah pawh Sikkim hi a hniam fal hle. IPC hnuaia thubuai ziah luh hi 549 awmin, hei hi mi nuai khat zelah pawikhawihna 80.3 awm ang a ni. Chargesheet theh luh pawh 55.5% chiah an nei bawk.

Sikkim-ah hian kum 2022 chhung khan pawngsual thubuai pali chauh report a ni a, dan loa pun khawmna engmah an nei lo. Mimal leh sorkar bungrua khawih chingpen leh khawih chhiat chungchangah thubuai 86 awmin, hmeichhe laka pawikhawihna chi hrang hrang pawh, heng dan; Dowry Prohibition Act, 1961, Immoral Traffic Prevention Act, 1956, leh Protection of Women from Domestic Violence Act, 2005 te avang hian awm lo tluk niin an sawi. Heng bakah hian khawtlangin an zawm tur dang; Juvenile Justice Care and Protection of Children Act, 2000 & 2015 leh The Child Labour (Prohibition & Regulation) Act, 1986 hnuaiah thubuai ziah luh a tlem hle bawk. Ralthuam tawlh ruk leh hman chungchanga ram pum a buai lai pawhin Sikkim hian thubuai panga chauh an ziak lut a ni.

Hetih lai hian state him tehnaah hian Bihar chu a hniam ber an ni a, kum 2022 chhung khan tualthah thubuai 2,930 awmin, Maharashtra chuan an dawt a, tualthah thubuai 2,295 a nei ve bawk. Madhya Pradesh-ah tualthah thubuai 1,987 awmin, Rajasthan chuan thubuai 1,834 an nei bawk a, West Bengal-ah hian tualthah thubuai 1,696 a awm bawk a ni.