Kalyan Barooah award dawng tur zingah Arunachal journalist tel

Delhi-a journalist senior, covid-19 laia boral ta, Kalyan Barooah sulhnu leh hnathawhte hriatrengna atana buatsaih, Kalyan Barooah Award dawng turin Arunachal Pradesh-a freelance journalist, Ranju Dodum chu thlan a ni.

Award dawng tur hi mi panga thlan an ni a, Dodum hi print media lama a thawh ṭhat avanga dawng tura thlan a ni. Dodum hi Arunachal Pradesh Union of Working Journalists (APUWJ) vice-president ni lai a ni bawk.

Award semna hi NGO, My Home India te chuan North East media forum nen ṭangkawpin an buatsaih dawn a, December 11 hian New Delhi-ah sem tum a ni. Dodum bakah hian News18 Assam associate editor Partha Jyoti Borah chu electronic media huangah award hi pek a ni dawn bawk a, Assam-a photogapher, Gitika Talukdar leh freelance videographer, Binod Tamang te chu award hi pek an ni bawk ang. Journalist bang tawh, Deepak Dewan chu lifetime achievement award pek a ni dawn bawk a ni.

North East Media Forum (NEMF) chuan,"Kalyan Barooah Award hi Barooah-a'n northeast-a thil thlengte ram pum huap chanchinbu lam thleng thei tura hma a lakna hriatrengna tur atan buatsaih an ni," an ti.