Nagaland : Oting-a thite hriatreng nan black day hmang

Nagaland khaw chhak lama civil society pawl ṭhenkhat; Phom People's Council (PPC), Phomla Hoichem, Phom Students' Conference leh Dobashis te chuan Thawhlehni khan PPC Hall-ah December 4-5, 2021-a Oting-a thi, mi 14-te hriatreng nan black day an hmang.

He hunah hian Phom People's Council office-ah flag dum zar pharh niin, ES PBCA hlui, Dr. Nuklu Phom chuan thu a sawi a, khaw chhak lama Naga awmte chu an inthurual a ṭul zual thu leh, an chhehvel ṭhatna atan hma an lak a ṭul thu a sawi. Phom Students’ Conference leh Phomla Hoichem president chuan December 2021-a Mon-a thite tana rorelna dik an sual chhuah ngei tur thu leh, AFSPA hlip tura an beih zel tur thu a tarlang bawk.

Mon district-a Oting-ah hian December 2021, ni 4-5 khan para commando te chuan lungalhthei laih chhuahna hmuna thawk, khaw mi parukte chu an haw kawngah lo ambush-in an kap hlum a, hemi hnua nawrh huaihawtnaah sipaite hian mi pasarih dang an kap hlum leh bawk a ni. He inkahna hi union home minister Amit Shah chuan thil hriat sual a nih thu Parliament-ah a sawi a ni.