Manipur leh Myanmar ramria inkahnaa thite nihna hre kim tawh

Manipur leh Myanmar inrina aṭanga km 10 vel leka hlaa awm, Manipur Tengnoupal district-a Leithao khaw daia Thawhṭanni zana inkahna thlenga thi, mi 13 te chu tute nge an nih hriat kim a nih tawh thu sorkar chuan a puang.

Ruangte hi Thawhlehni khan Imphal-a Jawaharlal Nehru Institute of Medical Science (JNIMS)-ah post mortem an ni a, an zinga a tam zawk hi Meitei tamna, Imphal valley-a chengte an ni hlawm a ni. An zinga pahnih hi Torbung leh Moreh-a awm, relief camp-a khawsa nia hriat an ni. Inkahnaa thi zingah hian rawlthar an tam ber a, an zinga naupang ber hi kum 16 mi chauh niin an sawi. Inkahna thlenna hmun, Leithao khua hi Machi police station hnuaia awm a ni a, Tengnoupal district chhunga awm niin, he district hian Myanmar nen ramri thui tak an inṭawm a ni.

Thawhṭanni zana inkahna thleng avanga nunna chante chhungte hian thil thleng chu an dem thu sawiin, state sorkar chu an chhungte venghim zo loah an puh a, ṭhenkhat chuan chief minister, N Biren Singh chu Manipur-a remna leh muanna awm tawh anga a sawi chungchangah an deusawh zui bawk.