Manipur cabinet-in zu zawrh leh in phalna dan pawm

Manipur cabinet chuan kum 20 chuang dry state an nih hnuah, chief minister N. Biren Singh kaihhruaina hnuaia meeting an neihah, state sum leh pai dinhmun siam ṭhat nan leh, zu ṭha lo in pawizia inhrilhna ni bawk turin, zu zawrh leh in phalna dan an pawm.

State cabinet hian Manipur excise (Amendment) rules, 2023 chu siam nghal bawkin; zu siam, zawrh tura buatsaih, zu kawl, zu lak luh leh thawn chhuah, zu phur, lei leh zawrh bakah in pawh phal a ni tiin an tarlang. Sorkar hian zu zawrh phalna hmang hian kum tin Rs. vbc 600 lak luh theih an beisei a ni. Cabinet thuchhuak chungchanga hriattirna kimchang leh sorkar thuchhuah chu siam vat a nih tur thu an sawi bawk.

Manipur hi April 1, 1991- a Manipur Liquor Prohibition Act an siam aṭang khan dry state an la ni a, zu siam, phurh, lak luh, zawrh leh in te chu khap niin, tun ṭuma zu zawrh leh in phalna siam hi civil society pawl hrang hrang leh mipuite chuan an thlawp hle a ni. Manipur hian nikum September khan zu khapna dan an neih chu phal chin neiin an lo tidanglam tawh a, dan siam danglam hnuaiah hian district headquarters-a hotel, khum 20 aia tam neite tana zu zawrh leh in chu phalsakin, state chhunga zu siamte thawn chhuah a phal bawk a ni.