Naga zirlai pawlte'n AFSPA hlih hma chu inbiakna neihpui tum lo

All Naga Students' Association, Manipur (ANSAM) chuan sipai hnena thuneihna sang pekna, dan sakei tia sawi ṭhin Armed Forces (Special Powers) Act (AFSPA), 1958 chu Naga area aṭanga hlih a nih hma chuan Indian armed force te nen inbiakna an neih loh tur thu an sawi. ANSAM thuchhuah hi kum 2022-a Naga Students' Federation (NSF) federal assembly neih ṭum hnihnaa an resolution siam nemnghehna a ni.

ANSAM chuan thuchhuah siamin, Naga mipuite rilruah chuan Operation Bluebird, 1987 te, 2021-a Oting-a sipaite'n civil mi an kahna avanga mi 14 lai an thihna te chu a thar fo thu leh, chung chuan hlauhna a la neihtir reng thu an sawi. "ANSAM chuan heng vanduaina thleng hrang hrang avanga nunna chante leh tuarte kan zahna leh tawrhpuina sang ber kan hlan a ni," an ti. AFSPA dan hman a nih aṭang khan Naga te chuan indona rapthlak tak a hmachhawn phah reng a ni an ti. "Khawvela democracy ram lian bera inchhal India hian eng tin nge Naga inpuia tualthahna, inruk bo leh inrikrapna thleng fo chungchang hi engtinge a sawi ang. India sorkar hian heng pawikhawihnaa a mawhphurtu, a hnuaia hnathawk security force official tam takte hi thiam loh a chantir ang em?" tiin an tarlang.

"Naga mipuite hi remna duhtu leh inrem taka nungho ṭhin kan ni a, Indo-Naga inkahhai, 1997-a ziah a nih hnuah pawh chutiang chuan kan nung chhunzawm reng a ni. Kha inremna khan India sorkar leh National Socialist Council of Nagaland (NSCN) inkarah thawhhona tur thuthlung ziahna tur a rawn hring bawk. Inremna ziah a nih avangin Naga leh India sorkar chuan inremna ṭha zawk pawh a neih phah a ni," tiin, Naga te chennaa AFSPA hman a la ni reng chuan inremna zawng zawng a thaichhiat thu leh India sorkar rintlak lohzia a tihlan thu an sawi bawk.