Hmarchhak biala LPG gas phurtute an nuar

North East Packed LPG Transporters Association (NEPLTA) chuan December 4 aṭang khan nawrh huaihawtin, hmarchhaka gas an phur luh ṭhin chu phur chhunzawm duh loin, hei hian Assam, Meghalaya, Mizoram leh Arunachal Pradesh-a LPG hmangtu mi nuai 84 a nghawng a ni.

NEPLTA joint secretary, Sanjiv Choudhury chuan tender rate siam thar chu kum 2011 aia a hniam thu leh, chutiang ang rate hniama an thawh theih loh thu sawiin,"LPG phurh man hi a hniam ve si lo a, tun kum nga chhung pawh khan company-te'n LPG phurtute hnenah Rs. vbc 2 ṭheuh a pek a ngaih phah a ni. Kan nawrh hi titawp thei reng kan ni a, chumi tur chuan Indian Oil Corporation Ltd. (IOCL) hian meeting tura min koh a, hemi chungchang sawi hi kan duh phawt a ni. December 4 aṭangin kan nuar ang tiin an sawi tawh a, nuar loa tender chhannaa tel ve mai turin min ti a, tender hi kan chhan ve chuan a hmaa kan ba pawh min pe dawn lo a ni. Sawihona neih a nih loh chuan kan nawrh kan titawp thei lo," tiin a sawi.

Indian Oil Corporation Ltd. (IOCL) Assam Oil Division (AOD) chuan heng LPG phurtute thil phut chu a dik tawk lo niin an sawi thung. NEPLTA te'n an nawrh avanga LPG an phurh chhunzawm duh lohna hi ni li a tling tawh a, Assam-a gas agency 851 te chu gas sem tur an neih tawh loh avangin an inkhar phah tawh a ni. Assam-a bottling plant panga - Mirza (Kamrup), Gopalnari (Tinsukia), Dhaligaon (Bongaigaon), North Guwahati (Kamrup Metro) leh, Duliajan (Dibrugarh) te pawh gas phur tur an awm loh avangin hna an chawl rih bawk a ni. Hetih lai hian Nagaland leh Maipur hmun ṭhenkhata LPG petu, Dimapur bottling plant, Tripura-a Agartala bottling plant leh Mizoram chawmtu, Silchar bottling plant te chu nawrh hian a nghawng rih loh thung.

IOCL hnuaia Assam Oil Division (AOD) hian an bottling plant 10 aṭangin ni tin LPG cylinder nuai 1.4 an siam a, hei hi hmarchhak state-te chawmtu a ni. Heng zinga bottling plant parukte hi NEPLTA nawrh hian nghawngin, heng bottling plant aṭang hian LPG cylinder nuai 1.1 siam chhuah a ni.