Meghalaya : Harijan colony-a chengte sawn chhuah nan ram acre 1.4 pek belh

Meghalaya sorkar leh Harijan Panchayat Committee (HPC) te chuan Ningani khan meeting neiin Meghalaya sorkar chuan Shillong, Them Iew Mawlong aṭanga chhungkaw sawn chhuah turte tan ram acre 1.4 pek belh a nih tur thu a puang zui.

HPC member-te chuan sorkar thutluknaah chuan an lungawi thu sawiin, sorkarin ruahmanna a neih pawh an pawmpui tih an sawi a, ram pek belh an nih thu chu Harijan Colony-a chhungkaw 342 te hnenah an thlen tur thu an sawi bawk. HPC secretary, Gurjit Singh chuan siam ṭhat ngai la awm tlemte chu meeting leh hunah siam rem a nih tur thu sawiin,"Kum thar lamah chuan engkim a fel tawh ang," tiin a tarlang. HPC leh Meghalaya sorkar hi nakkum January kar hnihna velah an ṭhu khawm leh dawn niin an sawi.

Meghalaya deputy chief minister, Prestone Tynsong pawhin meeting ṭha tak an neih thu leh, harsatna chhete la awm chu kum thar lamah an chinfel theih tawh a beisei thu a sawi a,"Municipal Board office building awmnaa ram acre 2.14 awm sa bakah acre 1.4 kan pek belh a, hei hi Municipal board building ep kawngpui lehlama awm a ni. Heti hian Harijan Colony-a chhungkaw 342 te insawn chhuah nan hian a vaiin ram acre 3.6 pek a ni tawh a ni," a ti.